Jiõnnvuõiggâdvuõtt

Vuäitak jiõnsted sääʹmteʹǧǧvaalin, jõs leäk miõrkkumnalla sääʹmteeʹǧǧ vaal-loǥstõʹǩǩe.

Eeʹjj 2024 vaalin Sääʹmteeʹǧǧ vaal-loǥstõʹǩǩe miõrkkum oummu vaal-loǥstõʹǩǩe meârkkmõõžž õõlǥtõs ǩiõttʼtõõlât pååđooccmõõžžtaa. Tuu vääʹldet vaal-loǥstõʹǩǩe ooccmõõžžtaa, jõs teâudak viõǥǥâst åårrai lääʹjjest šiõttuum meârkkmõõžž määin vuõssmõs mättjum ǩiõlâst (lääʹǩǩ sääʹmteeʹǧǧest 414/2025 3 § 1 päiʹǩǩ).

Jõs jiõk veâl leäkku vaal-loǥstõõǥǥâst, õõlǥtõssân jiõnnvuõiggâdvuõđ âânnmõʹšše puõʹtti sääʹmteʹǧǧvaalin lij, što tuejjääk ooccmõõžž vaal-loǥstõʹǩǩe mââimõõzzâst vaaleeʹjj oudldõõʹsti čõhččmannu loʹppe mõõneeʹst. Vaal-luʹvddkåʹdd ǩiõttʼtââll ooccmõõžžad da meârk tuu vaal-loǥstõʹǩǩe, jõs teâudak vaal-loǥstõʹǩǩe meârkkmõõžž määinaid.

Tuʹst lij vuõiggâdvuõtt šõddâd miõrkkumnalla eeʹjj 2027 vaal-loǥstõʹǩǩe, jõs âânak jiijjad säʹmmliʹžžen, õõlǥteeʹl što ton jiõčč leʹbe kuuitâǥ õhtt tuu puärrsin, maaddârpuärrsin leʹbe maaddârääʹjjest leʹbe maaddârääkkast lij sääʹmǩiõl vuõssmõs ǩiõllân (lääʹǩǩ sääʹmteʹǧǧlääʹjjest 414/2025 3 § 1 päiʹǩǩ).

Tuʹst âlgg õhtteed ooccmõõžžad snäätnas čiõlǥtõs Sääʹmteeʹǧǧest uvddum lääʹjj (414/2025) 3 § 1 pääiʹǩest jurddum sääʹmǩiõl mättjummšest vuõssmõs ǩiõllân (vuõiggâdvuõttministeria asetõs sääʹmteʹǧǧvaalin jääʹǩǩtem mõõntõõllmõõžžâst 965/2006).

Sääʹmteeʹǧǧ vaal-loǥstõʹǩǩe meârkkmõõžž õõudldõssân lij lââʹssen tiuddâkksažvuõtt di Lääʹddjânnam meerlažvuõtt leʹbe Lääʹddjânnmest sâjjdõʹtti dommkåʹdd, jõs leäk ålggjânnam meerlaž.

Eeʹjj 2027 sääʹmteʹǧǧvaali mâŋŋa tuʹst lij vuõiggâdvuõtt šõddâd miõrkkumnalla puõʹtti sääʹmteʹǧǧvaali vaal-loǥstõõǥǥid še tâʹl, jõs âânak jiijjad säʹmmliʹžžen da kuuitâǥ õhtt tuu puärrsin lij miõrkkum leʹbe lij leämmaž miõrkkumnalla jiõnnvuõiggâdvuõttneʹǩǩen 1. ođđeeʹjjmannust 2027 leʹbe tõn mâŋŋa jäʹrjstum sääʹmteʹǧǧvaalin (lääʹǩǩ sääʹmteeʹǧǧest 414/2025 3 § 2 päiʹǩǩ).

Tuʹst âlgg tuõđšted ruåttkõskkvuõtt jiõnnvuõiggâdvuõttnekka puärrsa ouddmiârkkân veʹrǧǧtuõđštõõzzin. Tääʹrǩab vuäppõõzzid iʹlmmtet vuõiggâdvuõttministeria asetõõzz sääʹmteʹǧǧvaalin jääʹǩǩtemvuâla mõõntõõllmõõžžâst (965/2006) ođsmõõveen.