Jienâstemvuoigâdvuotâ

Tun puávtáh jienâstiđ sämitiggevaaljâin, jis tun lah merkkejum Sämitige valjâluvâttâlmân.

Ive 2024 vaaljâin Sämitige valjâluvâttâlmân merkkejum ulmuu valjâluvâttâlmân merkkim iähtu kieđâvuššoo sierâ ucâmušttáá. Tun valduuh valjâluvâttâlmân ucâmušttáá, jis tun tiävdáh vyeimist orroo laavâst asâttum merkkim iävtu vuossâmužžân oppum kielâst (laahâ Sämitiggeest 414/2025 3 § 1 saje).

Jis tun jieh vala lah valjâluvâttâlmist, iähtun jienâstemvuoigâdvuođâ kevttimân čuávuváin sämitiggevaaljâin lii, ete tun toovah ucâmuš valjâluvâttâlmân majemustáá valjâive ovdedeijee čohčâmáánu loopâ räi. Valjâlävdikodde kieđâvuš tuu ucâmuš já merkkee tuu valjâluvâttâlmân, jis tun tiävdáh valjâluvâttâlmân merkkim iävtuid.

Tust lii vuoigâdvuotâ merkkejuđ ive 2027 valjâluvâttâlmân, jis tun anah jieijâd sämmilâžžân, toin iävttoin ete tun jieš tâi aainâs-uv ohtâ tuu vanhimijn, ááhust já äijihist tâi ááhui já äijihij vanhimijn lii oppâm sämikielâ vuossâmužžân kiellân (laahâ Sämitiggeest 414/2025 3 § 1 saje).

Tun koolgah lahteđ jieijâd ucâmušân lyetitteijee čielgiittâs Sämitiggeest adelum laavâ (414/2025) 3 § 1 saajeest uáivildum sämikielâ oppâmist vuossâmužžân kiellân (riehtiministeriö asâttâs Sämitige vaaljâin nuávdittemnáál monâttâlmist 965/2006).

Sämitige valjâluvâttâlmân merkkim iähtun lii lasseen 18 ive ahe sehe Suomâ aalmugjeessânvuotâ tâi Suomâst orroo päikkikieldâ, jis tun lah olgoeennâm aalmugjeessân.

Ive 2027 sämitiggevaaljâi maŋa tust lii vuoigâdvuotâ merkkejuđ čuávuvái sämitiggevaaljâi valjâluvâttâlmân meid talle, jis tun anah jieijâd sämmilâžžân já aainâs-uv ohtâ tuu vanhimijn lii merkkejum tâi lii lamaš merkkejum jienâstemvuoigâdvuođâlâžžân 1. uđđâivemáánu 2027 tâi tast maŋa uárnejum Sämitige vaaljâin (laahâ Sämitiggeest 414/2025 3 § 2 saje).

Tun koolgah tuođâštiđ hyelkkivuođâ jieijâd jienâstemvuoigâdvuođâlâžân vaanhimân ovdâmerkkân virgetuođâštussáin. Tärhibeh ravvuuh almottuvvojeh ko riehtiministeriö asâttâs Sämitige vaaljâin nuávdittemnáál monâttâlmist (965/2006) lii uđâsmittum.