Vaalin läittmõš

Jõs jiõnnvuõiggâdvuõttneǩ ǩeäčč, što vaali puäđõõzz raavummuž kuõskki vaal-luʹvddkååʹdd tåimm leʹbe tuʹmmstõk lij lääʹjjvuâsttsaž, son vuäitt tuejjeed vuõiǥeemõõlǥtõõzz Sääʹmteeʹǧǧ halltõʹsse. Vuõiǥeemõõlǥtummuš âlgg tuejjeed 14 peeiʹv määʹttest tõʹst peeiʹvest, kååʹđen vaal-luʹvddkåʹdd lij raavääm vaali puäđõõzz.

Sääʹmteeʹǧǧ halltõõzz âlgg ǩiõttʼtõõllâd vuõiǥeemõõlǥtummuš ǩirrlânji da mââimõõzzâst ouddâl vaaleeʹjj loopp.

Sääʹmteeʹǧǧ halltõõzz tuʹmmstõʹǩǩe vuäǯǯ ooccâd muttâz lääiteeʹl ââʹlmõs vaaldâšmvuõiggsa mââimõõzzâst 14 peeiʹv määʹttest tõʹst peeiʹvest, kååʹđen äʹššvuäzzlaž lij vuäǯǯam teeʹǧǧ halltõõzz tuʹmmstõõǥǥ teâttan. Muuttâsooccmest jääʹǩǩtet muđoi, mâid suudõõttmõõžžâst vaaldâšmaaʹššin uvddum lääʹjjest šiõtteet.

Jõs vaal-luʹvddkååʹdd tuʹmmstõk leʹbe tåimm lij leämmaž lääʹjjvuâsttsaž da tät lij vaaiktam vaali puäđõʹsse, vaali puäđõõzz âlgg vuõiǥeed da riikksuåvtõõzz taarbšeen mieʹrreed Sääʹmteeʹǧǧ vuäzzlaid da väärrvuäzzlaid vaali vuõiǥuum puäđõõzz meâldlânji.

Jõs vaali puäđõs ij leäkku vuõiǥeemnalla, vaal aʹlǧǧe mieʹrreed oʹđđest ââʹnnemnalla.