Vaaläʹššǩeeʹrj
Sääʹmteʹǧǧvaalin juâkksaž jiõnnvuõiggâdvuõttneǩ vuäǯǯ vaaläʹššǩiiʹrjid jiõnstummuž vääras. Vaaläʹššǩeeʹrj nårrje täin:
- vaal-luʹvddkååʹdd åårlin vaʹrrjum jiõnstemlipp
- vaalkonfeârt
- sättǩeʹrjj
- sättkonfeârt
- eeʹttǩeeʹjjloǥstõk da
- jiõnstemvuäppõs.
Lââʹssen mieʹldd lij takainalla še teâđtõs da vaalaaut äiʹǧǧtaull, jõs nåkam jäʹrjstet. Puk vaaläʹššǩeeʹrj liâ kooumin sääʹmǩiõlin da lääʹddǩiõʹlle.
Sääʹmteeʹǧǧest uvddum lääʹjj (414/2025) 29 § meâldlânji ǩeeʹrj vuõltteet tâʹlskani vaaltååimtõõzz ääʹljeen. Vaaläʹššǩeeʹrj tååimtet tuõđštõõzzlânji leʹbe pååʹšt mieʹldd ǩeeʹrjtõvvum ǩeʹrjjen. Ǩeʹrjj vuõltteet meerteâttriâžldõõǥǥâst åårrai veerǥlaž addrõʹsse leʹbe pååđaddrõʹsse, jõs leäk tuejjääm addrõsmuttâz. Ââʹn huõl, što addrõsteâđ liâ vuõiʹǧǧest. Jõs tuu addrõs ij leäkku teâđast, vaal-luʹvddkåʹdd ij vueiʹt vuõltteed tuʹnne vaaläʹššǩiiʹrjid.
Jõs jiõk vaaltååimtõõzz ääʹljeen leäkku vuäǯǯam pååʹšt mieʹldd vaaläʹššǩiiʹrjid leʹbe tõk jiâ muđoi leäkku tuʹst, lij tuʹst vueiʹtlvažvuõtt vuäǯǯad vaaläʹššǩiiʹrjid vaal-luʹvddkååʹdd konttrest, koʹst-ne vaalpeeiʹv jiõnstempääiʹǩest leʹbe vaal-luʹvddkååʹdd iʹlmmtem jeeʹres pääiʹǩest. Vääʹld tän vääras persoontuõđštõõzz mieʹldd. Tuʹst feʹrttai viǯǯâd vaaläʹššǩiiʹrjid jiõčč, ǥu tõid luõvtet persoonlânji.