Vaaljâin väidim

Jis jienâstemvuoigâdvuođâlâš ana, ete vaaljâi puáttus nonniimân kyeskee valjâlävdikode toimâ tâi miärádâs lii laavâvuástásâš, sun puáhtá rähtiđ vuoigimvátámâš Sämitige stiivrân. Vuoigimvátámâš kalga rähtiđ majemustáá 14. peeivi ton peeivist ovdâskulij, kuás valjâlävdikodde lii nonnim vaaljâi puáttus.

Sämitige stivrâ kalga kieđâvuššâđ vuoigimvátámâš huápulávt já majemustáá ovdil valjâive loopâ.

Sämitige stiivrâ miärádâsân uážžu uuccâđ nubástus väidimáin alemuu haldâttâhriähtán majemustáá 14. peeivi ton peeivist ovdâskulij, kuás ääšiomâhâš lii finnim Sämitige stiivrâ miärádâs tiättun. Nubástusucâmist nuávdittuvvoo mudoi, mii riehtijotemist haldâttâhaašijn adelum laavâst asâttuvvoo.

Jis valjâlävdikode miärádâs teikkâ toimâ lii lamaš laavâvuástásâš já taat lii vaiguttâm vaaljâi puátusân, te vaaljâi puáttus kalga vuoigiđ já staatârääđi táárbu mield meridiđ Sämitige jesânijd já värijesânijd vaaljâi vyeigejum puáttus mield.

Jis vaaljâi puáttus ij paste vuoigiđ, vaaljâid kalga meridiđ uđđâsist toimâttemnáál.