Valjâäššikirjeh
Sämitiggevaaljâin jieškote-uv jienâvuoigâdvuođâlâš finnee valjâäššikiirjijd jienâstem várás. Valjâäššikirjeh láá taah:
- jienâstemlippu, mast lii valjâlävdikode stemppâl
- valjâkooveert
- vuolgâttâsreivâ
- vuolgâttâskooveert
- iävtukkâsluvâttâllâm já
- jienâstemraavâ.
Lasseen mieldi lii táválávt meid tiäđáttâs já valjâauto äigitavlu, jis taggaar uárnejuvvoo. Puoh valjâäššikirjeh láá kuulmâ sämikielân já suomâkielân.
Sämitiggeest adelum laavâ (414/2025) 29 § mield reeivah vuolgâttuvvojeh tállân ko valjâtoimâttâs lii álgám. Valjâäššikirjeh toimâttuvvojeh tuođâštuslávt ađai poostâ peht kirjettum reivân. Reivâ vuolgâttuvvoo aalmugtiätuoornigist leijee virgálii čujottâsân tâi koskâpuddâsii čujottâsân, jis tun lah ráhtám čujottâsnubástus. Huolât jieijâd čujottâstiäđuid oornigân ääigild. Jis tuu čujottâs ij lah tiäđust, valjâlävdikodde ij pyevti vuolgâttiđ tunjin valjâäššikiirjijd.
Jis tun jieh lah valjâtoimâttâs älgim maŋa finnim poostâ peht valjâäššikiirjijd tâi toh váiluh monnii eres suujâ tiet, tust lii máhđulâšvuotâ finniđ valjâäššikiirjijd valjâlävdikode toimâttuvâst, jienâstempeeivi monnii jienâstemsaajeest tâi valjâlävdikode almottem eres saajeest. Vääldi tađe várás persovntuođâštus fáárun. Tun koolgah viežžâđ valjâäššikiirjijd jieš, tastko toh adeluvvojeh persovnlávt.