Nubástusuuccâmproosees

Jis tun arvâlah, ete tun lah rievtittáá kuođđum meddâl valjâluvâttâlmist, tun uážuh vaattâđ valjâluvâttâlmân kyeskee miärádâsân vuoigim valjâlävdikoddeest (laahâ Sämitiggeest 414/2025 26 §). Valjâlävdikoodán čujottum vuoigimvátámâš kalga toimâttiđ valjâlävdikoodán 14 peeivi siste valjâluvâttâllâm uáinimnáálá tolâmân kyeskee ääigi nuhâmist.

Ko valjâluvâttâllâm puátá uáinimnáálá te valjâlävdikodde almoot vuoigimvátámâš toimâttem meriääigi.

Jis vuoigimvátámâš, mii toimâttuvvoo valjâlävdikoodán, lii puáttám meriääigi siste nubástusuuccâmlävdikoodán, te vuoigimvátámâš kieđâvuššoo. Nubástusuuccâmlävdikodde kalga ájáttâlhánnáá toimâttiđ vuoigimvátámâš valjâlävdikoodán.

Jis valjâlävdikodde meerrid, ete tun valduuh vuoigimvátámâš vuáđuld valjâluvâttâlmân, te valjâlävdikodde vuolgât tunjin ájáttâlhánnáá jienâstemvuoigâdvuođâláid uáivildum almottâskoortâ.

Nubástusucâmist vuoigimvátámâšân kyeskee miärádâsân asâttuvvoo Sämitiggeest adelum laavâ (414/2025) 41 I §:st.

Nubástusuuccâmlävdikodde tuáimá vuossâmužžân nubástusuuccâmtäässin vuoigimvátámâšân kyeskee miärádâsâin. Nubástusuuccâmlävdikodde, mii tuáimá Sämitige ooleest, lii jiečânâs já sorjomettumis toimâorgaan. Ton tooimâst asâttuvvoo tärhibeht Sämitiggeest adelum laavâ (414/2025) 5 lovvoost.

Nubástusuuccâmlävdikoodán čujottum väidim kalga toimâttiđ valjâlävdikoodán 14 peeivi siste valjâlävdikode vuoigimvátámâš keežild tohhum miärádâs tiättunfinniimist.

Valjâlävdikodde kalga ájáttâlhánnáá toimâttiđ väidim, áášán kyeskee äššikiirjijd já ciälkkámušâs väidimist nubástusuuccâmlävdikoodán.

Nubástusuuccâmlävdikodde kalga kieđâvuššâđ väidim huápulâžžân.

Nubástusuuccâmlävdikode miärádâsân uážžu uuccâđ nubástus väidimáin alemuu haldâttâhriähtán, jis alemus haldâttâhriehti mieđeet väidimlove.