Iävtukkâsasâttem

Valjâlävdikodde tieđeet, ko iävtukkâsasâttem álgá. Talle almostittoo iävtukkâsasâttemluámáttâh sehe iävtukkâssân asâttem äigitavlu.

Jis tun halijdah iävtukkâssân, tuu iävtukkâsvuođâ kyeditteijee ulmuuh kalgeh vuáđudiđ väljejeijeeseervi. Väljejeijeeseervi vuáđđudmân tarbâšuvvojeh ucemustáá kulmâ jienâstemvuoigâdvuođâlii. Väljejeijeeseervist kalga leđe äššiolmooš já väriäššiolmooš.

Jienâstemvuoigâdvuođâlâš uážžu uásálistiđ tuš oovtâ iävtukkâs aasâtmân. Jis jienâstemvuoigâdvuođâlâš kulá kyevti teikkâ eenâb väljejeijeesiärván, te valjâlävdikodde kalga meddâlistiđ suu noomâ tain puohâin.

Iävtukkâsasâttem várás valjâlävdikodde almostit iävtukkâsasâttemluámáttuv, ko iävtukkâsasâttem álgá. Luámáttâhân kalga tevdiđ iävtukkâs já väljejeijeeseervi jesânij tiäđuid. Iävtukkâs kieldâ miärášuvá ton mield, mii lii suu päikkikieldâ iävtukkâssân asâttem meriääigi nuvâdijn.  Väljejeijeeseervi ij taarbâš vuáđudiđ sierâ peic iävtukkâsasâttemluámáttuv tevdim pijssáá toos.

Väljejeijeeservi kalga toohâđ iävtukkâsucâmuš valjâlävdikoodán majemustáá 31 peivid já toos kyeskee tievâsmitmijd majemustáá 27 peivid ovdil valjâtoimâttâs algâttem.

Valjâlävdikodde kalga rähtiđ iävtukkâsluvâttâllâm majemustáá 21 peeivi ovdil valjâtoimâttâs algâttem. Iävtukkâsluvâttâllâm kalga almostittiđ, vuolgâttiđ valjâäššiulmuid já toollâđ vaaljâi ääigi  uáinimnáálá.

Valjâlävdikode miärádâsân iävtukkâsluvâttâlmist ij uážu uuccâđ sierâ nubástus.