Sámediggeválggat

Sámediggi lea sámiid álbmotválljen iešráđđenorgána Suomas. Sámedikki dehálamos bargu lea ollašuhttit vuođđolágas dasa dorvvastuvvon giela ja kultuvrra guoski iešráđđema ja maid dorvvastit sámi eamiálbmotkultuvrra seailuma ja ovdáneami. Sámedikki čoahkkin ovddasta Sámedikki bajimus mearridanválddi. Sámedikki čoahkkin mearrida váldooasis cealkámušain, evttohusain ja eará bealiváldimiin, maid Sámediggi addá.

Sámediggái gullet 21 lahtu ja njeallje várrelahtu, geat válljejuvvojit válggaiguin. Sámedikkis galgá leat unnimustá guokte lahtu ja okta várrelahttu Eanodaga, Anára ja Ohcejoga gielddain ja maid Soađegili gieldda Lappi bálgosa guovllus. Loahpat 13 lahtu válljejuvvojit válggaiguin jietnameari vuođul, goittotge nu, ahte unnimustá vihtta lahtu galget leat sámiid ruovttuguovllus. Sámedikki doaibmabadji lea njeallje jagi. Dat álgá válgajagi juovlamánu 1. beaivve.

Sámedikki válggat dahjege sámediggeválggat doaimmahuvvojit juohke njealját jagi. Sámediggeválggat leat njuolggo personválggat, main jietnavuoigadahtton olbmot jienastit njuolga ovttaskas evttohasaid. Sámediggeválggain lea dušše okta válgabiire. Sámediggeválggain jienastanvuoigatvuohta lea juohkehaččas, guhte lea merkejuvvon Sámedikki válgalogahallamii. Válgalogahallamii merkemis ásahuvvo Sámedikkis addojuvvon lága (414/2025) 3 ja 21 §:in.

Sámediggeválggain evttohasaid sáhttet ásahit válljenovttastusat, maid leat unnimustá golbma jienastanvuoigatvuođalaš olbmo vuođđudan. Guhtege jienastanvuoigatvuođalaš olmmoš sáhttá gullat dušše ovtta válljenovttastussii.

Sámedikki čoahkkima nammadan válgalávdegoddi doaimmaha sámediggeválggaid Sámedikkis addojuvvon lága 4 logu ja Sámedikki válggain čuovvunvuloš meannudeamis addojuvvon vuoigavuohtaministeriija evttohusa (965/2006, ođasmahttima vuolde) mielde. Válggat doaimmahuvvojit vuoigatvuohtaministeriija juolludan mearreruđain.